|
१३ फेव्रुरी, २०१०, दुबई। बरदुबईको एभरेष्ट इन्टरनेशनल होटललाई हिजो यूएईका नेपाली गजलकारहरूले गजलमय बनाए। नेपाली साहित्य तथा साँस्कृतिक परिषद् यूएईले आयोजना गरेको "दुबई गजल मुशायरा २०६६" मा १७ जना गजलकारले गजल प्रस्तुत गरे। प्रथमपटक भएको भिन्दै प्रकृतिको यस गजल मुशायरामा संयुक्त अरब इमिरेट्सका विभिन्न शहरहरूबाट गजलकारहरूको आगमन भएको थियो।
गजलकार चेतन कार्कीले आफ्नो गजल वाचन गर्दै शुरु भएको मुशायरा जैकी मोजाहुको वाचनबाट सकिएको थियो। विभिन्न गजलकारहरुको भिन्दा भिन्दै विशेषतायुक्त गजलहरूले दर्शकहरू गजलमा बहकिएका थिए। नेपाली दूतावासका नियोग उपप्रमुख दीपक अधिकारीको प्रमुख आतिथ्यमा सम्पन्न उक्त कार्यक्रममा विभिन्न सामाजिक कार्यकर्ताहरूको समेत राम्रो उपस्थिति रहेको थियो।
कार्यक्रमको पहिलो चरणमा नेपाल पत्रकार महासंघ यूएई समपर्क शाखा र अन्तर्राष्ट्रिय नेपाली साहित्य समाज यूएई च्याप्टरले पत्रकार तथा साहित्यकार कृष्ण देवकोटालाई दोसल्ला ओढाई सम्मान गर्दै विदाई गरे। रसियाका नेपाली साहित्कार मधु माधुर्यले पनि कविता वाचन गर्दै यूएईको नेपाली साहित्यको चर्चा गरे।
कार्यक्रममा नेपाली साहित्य तथा सांस्कृतिक परिषद् यूएई र नेपाल यूएई साहित्य परिषद् एकीकरण भएको घोषणा गरियो। एकीकरणको घोषणा गर्दै दुवै संस्थाका अध्यक्ष क्रमशः गिरधारी रिजाल र समदर्शी काइँलाले यहाँ रहेका सवै साहित्यिक संस्थाहरू एक ढिक्का हुनु पर्नेमा जोड दिए।
गिरधारी रिजालको सभापतित्वमामा सम्पन्न उक्त कार्यक्रममा गैह्र आवासीय नेपाली संघ अन्तर्राष्ट्रिय समन्वय परिषद्का कोषाध्यक्ष रामेश्वर शाहले एनआरएनएका नयाँ उपलब्धिहरूबारे जानकारी दिए। उनले यूएईको आफ्नो पाँच वर्षको बसाइमा प्रथमपटक यति स्तरीय र आकर्षक साहित्यिक कार्यक्रम भएको बताए।
यस दुबई गजल मुशायरा २०६६ मा गजलकार जैकी मोजाहु, दलवीरसिंह बराइली "घायल", उमेश राई "घायल", आदिल सर्वर "नेपाली", ऋषिशेष, धनकुटे कान्छा, निश्चल, लोकेन्द्र बञ्जारा, असिम महत, रेखा घिमिरे, बसन्तमोहन अधिकारी, कृष्ण देवकोटा, टेक थजालीमगर, माइनस प्लस संग्रौला, चेतन कार्की, दीपक अधिकारी, अर्जुन दाहाल र कैलाश राईले गजल वाचन गरे।
गजलकार जैकी मोजाहुको सभापतित्वमा सम्पन्न दोश्रो चरणको यस गजल मुशायरामा गजलकार माइनस प्लस संग्रौला, धनकुटे कान्छा, जैकी मोजाह, रेखा घिमिरे, आदिल सर्वर "नेपाली", उमेश राई "घायल", ऋषिशेष, लोकेन्द्र बञ्जाराका शेरहरूले दर्शकको जितेका थिए।
जैकी मोजाहु र रेखा घिमिरेले प्रस्तुत गरेको दोहैट गजलले हल तालीले गुञ्जायमान भएको थियो।
भेट्ने छु तिमीलाई चौतारीमा सोल्टी
नाचौंला रंगीचंगी फूलवारीमा सोल्टी
माया लाउन गाह्रो छ म विश्वास गरूँ कसोरी
हाम्रो मिलन छैन सम्भव यो खाडीमा सोल्टी
|
